ا
في الزمن الداير بينا دا، الناس بقت تمشي كتير بي مقولة: “البعمل خير ما بلقى خير”… لكن الحقيقة، الخير ما بتعملو عشان تقيف تتلقى المقابل، الخير بتعملو عشان إنت زول قلبك صاح.في سنة 1968، زول أمريكي اسمو “كينت كيث” كتب عشرة وصايا سَمّاها “الوصايا المتناقضة”.
كانت وصايا كلها عِبر، بتقول ليك: “الناس ممكن يخونوك، ما يقدروك، يسيئو ليك… لكن أعمل الخير برضو”.وبعد سنين، الزول دا لمّن وصاياه في كتاب سمّاه “على أية حال”، الكتاب دا لقى رواج كبير، واترجِم لعشرات اللغات، وناس كتار حَفِظوهو في قلوبهم، عشان ببساطة… بيكلم الإنسان فيك.
الوصايا العشرة بالطريقة البسيطة بتاعتنا:
1. الناس ما منطقية وبتفكر في روحها أول أحبّهم على أية حال.
2. لو عملت خير، ممكن يسيئو الظن فيك. أعمل الخير على أية حال.
3. لو نجحت، بظهروا ليك أصدقاء كضّابة وعداوة حقيقية… أنجح على أية حال.
4. الخير البتعملو اليوم، ممكن ينسوه بكرة.أعمل الخير على أية حال.
5. الصراحة مرات بتجيب ليك وجع رأس.كن صادق على أية حال.
6. العقول الصغيرة بتحبط الناس الكبار… تمسك بأفكارك على أية حال.
7. الناس بتعطف على الضعيف، لكن بتمشي ورا القوي… دافع عن الضعيف على أية حال.
8. ممكن تبني حاجة سنين وتتهدّ في ليلة… *أبني على أية حال.
9. الناس دايرين مساعدة، لكن مرات بهجموك لو ساعدتهم… ساعدهم على أية حال.
10. لو قدمت أحسن ما عندك، ممكن يردّوا ليك بالإساءة… قدّم أحسن ما عندك على أية حال.
في النهاية…إنت ما بتعمل الخير عشان الناس، ولا عشان الشهرة… بتعملو عشان ضميرك، عشان ربّك، وعشان الإنسانية الجواك، وصدقني، العمل البنبت في أرض حسب نيتك الصافية، لم يضيع… حتى لو اتأخر المطر، وكل ما تتردد، قول لي روحك : أعمل الخير… على أية حال.
