موية و بن نادر التوم
(نكهة أصلية)
#
هسه بتقطع، since السبعينات!
#
الليدو في الموية!
لما كنت صغير، (التاء متكلم و مخاطبة)، بنلعب بالتراب صاح؟ و بعد كبرنا مرات براااحة كدا بنلعب بالتراب صاح؟، نحن اصلا من تراب، صاح؟؟ و ابونا آدم على نبينا و عليه الصلاة والسلام خلق من تراب،صاح؟لو ختيت ليكم رقم حسابي بتحولوا صاح؟؟؟؟
المهم تلك اللعبات الجميلة تظهر و تختفي، أو كما قال الفنان (نظهر نغيب) يا حليلو
و زمان كان في لعبات حلوة كتيرة بنفس الاستراتيجية (زي الليدو)، طبعا بتكلم عن ليدو الورق، يظهر مرة و يرتاح مرة، يا القمرووو، إلى أن جاء (حق التلفون)، برضو يظهر و يغيب و لكيزان زي الليدو
و اللعبات التانية دايرين يظهروا تاني!
طبعا ليدو الورق اجمل، فيو خطط و (كباري)، و ممكن تلعب بي كلبين (نردين)، و فيو كتل كتير و (سك)، و مكاواة، و (حظ)، و متعة ،لكين نادر ما تلقى زول بلعبو، حتى الكيزان، الشغل الالكتروني دا ، ودى حاجات كتيرة سلة المهملات، مع انها كانت مستمرة معانا سنين طويييلة، في حاجات اقتنعت و في حاجات لسه (دايرة تظهر)!
عموما الليدو في الورق، ما زي الليدو في التلفون، والليدو في الموية (ناس بل بس#) ، مازي الليدو في النار (الناس الفقدو اي شي حتى تلفوناتهم بي ليدوهاتها)!
……………………………..
و لا شنو آ جماعة؟
الخطان المتوازيان جمالهما في أنهما لا يلتقيان .. لكن يمكن أن يشكلوا لوحة جميلة في عدم التلاقي، حتى لو كانوا قريبين جدا من بعض، هسه اتخيل لو كانت الخطوط المتوازية بتتلاقى، القطر دا كان يمشي كيف؟
……………………………..
كرامة!!
الحب ما فيو كرامة،و الناس ديل كان بحبو بعض، ما كان قامت حرب، اي ناس بتحاربوا, أنا ما قاصد ناس (معينين)!
………………………………
رجالة!!
أي حاجة في البلد دي بقيسوها (بالدولار)، حتى الرجالة!
مع انو في عملات عربية و إسلامية ارجل منو كتير!
………………………..
الضحك بي سبب!!
الضحك يميت القلب
الضحك يداوي القلب
للتوازن بين المعادلتين:
الضحك الكثير يميت القلب …..
و الضحك( بمقدار)، يطرد الهم و الغم،القهقهة من الشيطان و التبسم من الله!
الضحكة هناك من جوة الجووف ، و البسمة هناك ما فيها الخوف، هناك دي (مكانها وين)؟؟
للعلم في ناس عندهم (ضحاكات)، و تلقاهم عابسين، و (صارين)، و في ناس ما عندهم التكتح (زيي و زيك)، تلقاهم يضحكوا و يضحكوا الناس، و (صابرين)، و لا أحتاج أن اذكركم أن (أفضل الأعمال سرور تدخله على مسلم)، كما روى عن رسول الله صلى الله عليه وآله وسلم!
و ليس الضحك بدون سبب، في كل الأحوال (قلة أدب)، مرات بكون (قلة حيلة)!
…………………………….
موتيفيشن!
(أمر سعادتي متروك لي)!
رسالة إيجابية لكن ليس للسودانيين، امثالي و امثالك!
هذا الكلام، زي كلام( بتاعين التنمية البشرية) ،البقولوا ليك وفر 10٪ من راتبك، مع انو راتبك لو زادوا ليك 10 مرات لا تستطيع أن توفر منه!
أمر سعادتك متروك ليك، دا لما ما يكون في ناس قاعدين مخصوص عشان يتسلطوا عليك و يتصنتوا عليك، و يتربصوا بيك، و يتمتعوا لما يغلطوا عليك!
……………………………..
حرمان!!
اطفال العالم الأول محرومون من سعادة يومية .. فرحة اطفالنا، و صرختهم بي جية الكهرباء، متعة لا تضاهيها متعة، من نحن صغار نفس الهتاف :الكهربا جات أملوا الباغات، (هسه بتقطع) شفتو الطاقة السلبية دي، و التشاؤم دا،اها من الوكت داك (لسه بتقطع)،
اطفال الدول المتقدمة، و المتأخرة (الكهربتها ما بتقطع) محرومون من هذا الهتاف، و غيره، اطفال كتار بهتفوا (عاش ابو هاشم)، لما الكهربا تجي،،
أما اطفالنا ذاتهم العايشين في الدول البره (الكهربتها راشحة طوالي)، فإنهم لا يذوقون لهذه الهتافات و الفرحة الهستيرية و السعادة الغامرة طعما، يصحوا من النوم الكهربا قاعدة، فطروا، شغااالة، اتغدوا راشحة، ناموا، قاموا، قعدوا حاموا شغالة (دا شنو الملل دا؟؟؟؟)!
…………………………
اختفاء!
طبيعي في ظل اختفاء الشوارع أن يختفي أطفال الشوارع، الأيام دي المجد للفراغ بس#
قلية: يا أستاذ ماهيتك كم؟ كيلو السكر بقى بي كم؟؟ من بقى بالكيلو طار السما و بقى (ما عندوا طعم)!
دواء: دواء المشكلات حقة البلد دي كلها، العرس، تضحك شنو؟ بوريك في مقال تاني، إن شاء الله!
بخور:
رجيتك و في انتظار عينيك كملت الصبر كلو!!
(مرتبات السنة الفاتت و القبالها)
سفر البن: قطعة الكهرباء!
فنجانك: الأمور طيبة إن شاء الله ، أصبر بس#
آخر رشفة: ما بدوم العز و المفاخر ، و كلو أول ليه آخر!
اللهم صل على سيدنا محمد و آله و سلم!
مدفوعة
