موية و بن نادر التوم

نكهة حقيقية

نفسيات!!!!

☕ (الجنزير) الذي تربط به المكيفات الهوائية، على الجدران، هل يثبتها حقا، ام أن الأمر نفسيات بس؟؟!
☕ الطماطم التي تقطع شرائح، و الجرجير و الخضروات، و الفواكه، التي توضع على حواف الأطباق، هل هي للأكل، أم مجرد نفسيات؟
و هل الإنسان فعلا يأكل بعينه، و هل إذا وجد مثل هذه النفسيات (يأكل على عينه)؟
☕ و مثل ذلك العصائر ،و قوارير المياه (معدنية و غازية)، التي توضع أمام الضيوف، في الفضائيات و المؤتمرات الصحفية، هل يشربونها أم نفسيات فقط و (دعاية)؟
☕ الشاشات المعلقة في أماكن خدمات الجمهور، و المستشفيات، و التي تحتاج لأن يكون (نظرك) ستة على ستة، حتى (تسمعها)، هل هناك من يشاهدها أو يسمعها أم أن الموضوع نفسي (حركي)؟
☕ تخاريج الأطفال (في) الروضة، و المهرجانات، و الكرنفالات، و حنة الخريجين من الجامعة (الشباب)، الشغل دا أكيد نفسيات!
☕ المرأة التي (تغير لونها)، و(جلدها)، و التي تعمل شعر صناعي، و عيون مركبة، و تبدل خلقتها، هل هو عدم رضاء بما قسم الله لها ؟؟ و لا بتخيل ليها (كدا أحلى)؟ ولا بتحب تكون (ملعونة) ؟؟ ام أن الموضوع و ما فيو نفسيات؟
☕ بالنسبة للناس البحبو، عندما (تقدم) فتاة، و ترجع لوحدك، و تساهر الليل يا جميل، و تفكر في لقاء جديد، و تكتب القصيد، بينما هي تشاهد في (أرمان) ، و أبطال المسلسلات الهندية، و التركية، هل هذا حب أم نفسيات؟؟،و هل لو تزوجتها (بتقدمها) تاني؟؟
ام بتهرب لتجلس مع رفاقك الكانوا يقدموا زيك، جوار ست الشاي؟؟!
افتكر انو (ست الشاي) تستحق مقالا كاملا!
☕ و هل ستات الشاي، شايهم و قهوتهم احلى من (أسياد الشاي)، ام نفسيات؟
تلك التي جعلت شابا بكامل قواه العقلية، (يعمل فيها) ست شاي، لسنة كاملة، في الحقيقة الناس لا يركزون كثيرا ، ست شاي، سيد شاي (متنكر) ،الأمر كله نفسيات، و هروب من الكانوا بقدموهن زمان!
☕ حينما تكون هناك زولة ( ما حلوة)، و تفرض على المشاهدين و المتلقين، و هي و من شغلوها شايفين إنها جميلة، ايدخل هذا في نطاق النفسيات أيضا؟؟؟
☕ لنفترض أنها جمييبلة، و (مسيرة)، لكن (رأسها فاضي)، هل احتلالها الصفحة الأخيرة (زمان)، أو الفضائيات (الآن) استخفاف بالعقول و لا نفسيات؟
☕ و هل اختيار مذيعات الاخبار حلوات، و لابسات قصير، و (يضربن بأرجلهن)، و (يبدين زينتهن) و (يخضعن بالقول)، من باب النفسيات؟
الناس يلقوها من الأخبار، و لا من مذيعات الأخبار؟؟ أحيانا بجيك احساس أنها تقرأ هذه الاخبار لجارتها، أو اختها (في البيت)!،ماخدات راحتهن بالكامل، و العالم كلو جايط!
☕ المحفظة أو ما يعرف (بالجزلان)، هل وضعه في الجيب كالختم البارز نفسيات؟؟ ام تمثيل؟؟؟ و الأمر ينطبق على بنكك (الفاضي) ، هل فتحه كل دقيقة نفسيات؟
☕ ليس لديك سيارة و لكنك تحمل مفتاح عربية، اربع و عشرين ساعة، هل هذا من قبيل (التنمية البشرية) ام نفسيات؟
☕ الحرب القامت دي، و المولعة في العالم كلو، عليكم الله ما (نفسيات)؟
☕ البص يكون فااااضي، يخشوا فيهو الكماسرة، و السماسرة، و السواقين و عابري الطريق، ثم يقولوا ليك (نفرين و طالعين)، بينما تمكث حتى (تطلع روحك)، حرمنة و جرجرة، أم نفسيات؟؟
☕ المغترب عشان ربنا فتح عليو ، بجي لابس أزياء مميزة، و لا نفسيات؟ طيب لو بقى المغتربين كتار، ح تبقى زي ال(على الله)!
☕ معظم الناس بقت تلبس على الله، ـ و الناس تعمل حسابها لما تجي تجمع الكلمة دي، الواحدة على الله و الدستة برضو على الله ـ هل لبس العلى الله عشان موضة، و الناس اقتنعت انو كلها من الله و على الله؟؟ ولا نفسيات؟
☕ الفتاة يكون مافي اي زول اتقدم ليها (زي القنبلة)، و ونستها كلها فلان اتقدم لي، و علان رفضتو، و فلان و علان يكونوا ما عارفها بت و لا ولد
دي نفسيات شنو دي؟
سمعنا بالحمل الكاذب، لكن الحب الكاذب دي جديدة
☕ الاولاد البلبسوا هدوم البنات، و …. العكس
هدوم و حركات
الشغل دا (صعلقة جديدة)، و لا نفسنة؟
☕ الناس الاتخصصوا في المجال النفسي دا ، هل هو شغف، و بتحبوا، و لا مجرد نفسيات؟
☕ بدون مقدمات سألني: (بنكك شغال)؟؟
بكل حماس أجبت: أيوه!
أردف: طيب ما تحول لي!
ضحكت حتى بانت نواجزي، أنقروا ما حولت ليو؟
قال لي: ياخ انا بهظر!
قلت ليو : و الله (ضحيكتك) لي دي بالدنيا، قال لي اللخو من وين؟
قلت ليو انت داير تصاحبني و لا شنو؟
المهم هسه دا لو قال لي، لي كم يوم جعان، و عيان ، و شنو ما عارف، ما كان بحول ليو، بنكك ذاتو نفسيات، لو ما نفسيات يومك اليكون حسابك فاضي، يكون شغال زي الطلقة (الما بتكتل)، و لما يكون فيو شي يحلف ما يفتح!
آخر رشفة: حركة سواطة الكباية و الفنجان في النهاية،نفسيات، و لا مزاج و لا تعوبدة و لا ( كيف)؟
اللهم صل وسلم وبارك على سيدنا محمد و آله!
مدفوعة