من الساخر نادر التوم
سخرية الواقع و واقعية السخرية
ويييبن؟ ويييين؟؟ وييييين؟؟؟
السوق العربي وين؟
الصمغ العربي وين؟
مجلة العربي وين؟
الحلم العربي وين؟
العربي ذاتو وييين؟
كلهم ما ظاهريييين!!
سمعنا قالوا في زيادات
من يناير الفات
و لليلة لسه ما جات
دي حقيقة و لا حركات؟
ولا انتو كضابيييين!!
قالوا المعلم أعلى راتب في الدولة
و ح يكون عندو صولة و جولة
بس نقول لا حولا
و لا قوة إلا بالمتين!
قالوا كورتنا بقت تمام
و ماشة لي قدام
ح تحقق الأحلام
و نعيش في سلام
و نبقى متوجييبن
وين الكاسات
وين البوطولات
عايشين ع الماضي الفات
و (أسسنا) الاتحادات
و مانديلا من ما مات ليهو سنيببببن!
أما عن الفنون
انا عديل ممكون
غنا تقول كاتبو مجنون
ازعاج و فوضي و مهرجييبن!
و اي زول بقى يقول اشعار
و اي زول بقى كمان سمسار
و الناس بتفتش للاخبار
بقوا مهووسيييين
ما بتعرف تمثيل
دمنا ياخينا تقيل
من بعض بنشيل
و بنكره عديل
عينا نحن في القيل
و نطعن في الضليييين
(الميديا) ملانة مصائب
ما بتفرق بين صغير وشايب
زول معيوب و آخر عايب
ظهرت ياخي عجايب
بس نقول الله غالب
يلطف بينا و يعين!
تخدروا فينا ساي
عارفين (الزول) نساي
رغم شراب الشاي
و القهوة بي جاي و بي جاي؟
و نحن مصدقيييين!
……………………….
وين الاغاثات ؟
القالوا وصلت وجات
ما شفنا أي حاجات
و الناس في (التكيات)
عطاشى و جوعانيييبن
نييببن!
العملة الجديدة وين؟
لسه بالقديم شغالين
و الله بقينا ملخبطين
و برضو محبطين
مع انهن مافي الاتنين
مافي الاتنييبببن
و الكهربا تقطع قبل ما تجي زي الناس
و الله غلبنا خلاص
أصابنا نحن الياس
الضلمة صارت اساس
و اتعطل حتى الاحساس
ارحمونا يا ناس
خلونا يقولوا لينا
(منوريييين)!!
وين العودة الطوعية؟
و الناس ترجع دغرية
تبني بلدها بي جدية
و تاكل فرخة بدل الطعمية
تعيش في فرحة بدل الأسية
ما يكونو مستهبلييين
وين الجاهزية ؟
السودوا هم النية
و خلو حياتنا شقية
خربوا جامع هدموا بنية
دايرين يحكموا (بالنية)
أقصد بالبندوقية
لكن يحكموا مين مييببن؟
وين الكيزان؟
شكلو رجعوا الآن
كلو من حمدوك
ما بل الاخوان
رجعوا اخطر من زمااااان
واااااي واااااي واااااي ن!
دي ح تكون ضحكتكم شديد
لكين دا الحاصل بالتحديد
نسال الله المجيد
يلطف بالعبيد
و ما ترجع تاني سنييببن
سنييببين!
وين المعلمين
وين المهندسين
وين الملازمين
وين الطيارين
وين الطيانين
خلوا بلدنا حزين
فاتو و ما جايين
يا ربي يا حنين
ما يشوفوا أنين
و يرجعو هسه الحين
الحييييين!
وين الخدمات؟
وين المرتبات
وين القيادات
وين الكنداكات
وين الشفاتيييين ؟
بلدنا اتملت شفشافين
و كلو يوم زايدين
ولا في زول سائلين
لا خلوا دهب لا جلسرين
و لسه ما واقفيييييبن
فيييييين!!
وين البنزين ؟؟
و الغاز البجنن
و الفحم ما هين
نولع نحن الماساكييين
مساكيييين
و نحرق بي بنزين
و الله فترنا عديل
و انهد كمان الحيل
مغبونين بالحبل
نهارنا أصبح ليل
و بقينا مطشسين
شييييبن!!!
لو نكتب لي الصباح
و نسأل سؤال مباح
تفتق في الجراح
احلامنا خلاص( باباح)
و نحن ما فاهمين
ميييببن!!!
(بس خلاص) زي م بقول شعبان
نسال الله الحنان و منان
يلطف بالسودان
و يبعد للاحزان
و تقيف الحرب كمان
و تصبح مسرورين
في حاجة بقولا يا ناس
حقو يكون عندنا احساس
ترحم و نترقق بالناس
كفاية أنانية خلاس
نحب و نكون محبوبيييين!
بييييين مستر بييييين!!
الله معانا اقوى و أعظم من الكيزان
و القحاطة الكلو يوم بي اسم و في مكان
قادر يلطف بالسودان
و يعيشون في أمن و امان
وناسو مبسوطين! رغم أنهم طييببن !
وين صلاتكم على المحبوب
بتقفل هم و تفتح لينا دروب
بتخلينا نحن نرجع و نتوب
ولي الله كمان نؤوب
و تبقى ناس كويسييييين!
الفترة الانتقالية
فترة لا نهائية
زي الكسور الدورية
كتيرة ما ها شوية
تتجدد كل شوية
و نحن منتظرييين!
لي متييين لي متيييين؟
وين الإنتخابات؟
العمر عدى و فات
الشعب تلتو مات
و تلتو التاني فات
و تلتو القوى بات
الناس المرطبين
البيا ما حاسين
معانا ما محسوبيييين!
وين القراب؟
وين الأصحاب؟؟
وين الأحباب؟؟؟
فاتو و قفلوا الباب
نسونا الشباب
سدوا دي بي طين
و دي بي عجيييين!
وين النكات؟
الفرفشة و الضحكات
في كل المناسبات
راديو و فضائيات
الوضع كلو جاط
و صاروا عابثيييين!
العندنا ماهو قليل
عندنا أعذب نيل
من الجنة عديل
سودانا جد جميل
يله نشد الحيل
و نرجع تاني معلمييين!
لو صفينا النية
العندنا ماهو شوية
بس دايرين همية
نبعد العنصرية
و نكون لي بعض محترمييين!
نحافظ على الثروات
و قبلها الصلوات
نصفي النيات
نرجع أحسن من ما فات
بلدنا يكون جنات
فيها منعمييين!
ما ندي فرصة للحسود
ولا الدائر عنوة يسود
الناس العملو بينا سدود
عزمنا بكون معقود
خيرنا لا محدود
بس نعمل و ربنا لينا بعين!
لو ختينا الرحمن
في قلبنا العمران
ح نواصل العمران
نرجع افضل مما كان
و في مقدمة البلدان
نحن حضارة و ساسنا متيييين
الزمن ماشي
و ما صنعنا شي
نتكلم في اي شي
و ما عاجبنا شي
و كلنا منتظرين
كفاية شبعنا وعود
من زمن الجدود
بلدنا لازم يعود
للعالم كلو يقود
و نحن مؤهليييين!
وين أخلاقنا زمان
الزول كان إنسان
و يفخر من السودان
بلدنا كان غنيان
و بأكل الجاعانيييين!
تنبيه مهم: لو أكملت المقال لنهايته و صار حديثك على قافيته في البيت في الشارع في المسرح فهذه ليست مشكلتي فأنا اخلي مسؤوليتي
و إذا قراته زوجتك و أكثرت عليك الطلبات من شاكلة وييين؟ وين المثاريف، حق الرغيف،قرةش التغليف، اللحم الظريف، حتي لم تعد تعرف تهرب وييييين، فليس ذنبي!
كما أنني غير مسؤول عن اخطاء (المغلط اللغوي) حق التلفون.
………………………….
ودعناكم الله يا حلوين
أن شاءالله تأمين ولامين
الله يرحم الميتين
و يشفي المصابين
و يرجع الماسورين
و يجمع شمل المفقودين
يرجعوا الناس متطامنين
يتملي بنكك و التطبيقات التانين
تصفى النية نكون رايعين
و بلدنا رايق و زيييبن
زيييبن!
اللهم صل وسلم وبارك على سيدنا محمد وعلى آله وصحبه بقدر عظمة ذاتك يا أحد!
ودعناكم الله
……………………….
