من الساخر نادر التوم
سخرية الواقع و واقعية السخرية
ألف باء تاء ثاء 2-3
رسالة مثبتة :
ـ كوني أنتقد الكيزان هذا لا يعني أني قحاطي، و كوني أنتقد القحاطة فليس معناه أنني فلولي، و كوز مندس، و كوني احتفل بالمولد النبوى الشريف، و أتوسل بالنبي (صلى الله عليه وآله وسلم)و أتوسل بآل البيت (عليهم السلام )و الصحابة (رضى الله عنهم) و التابعين و الصالحين (رضي الله عنهم)، فهذا لا يلبسني تهمة الكفر بأي حال من الأحوال!
راء
ـ و كمان عملوا ليها شهادة؟؟ (مزاولة مهنة)
ـ نحن الواحد بقى يزاول من مهنتو
ـ (الضل الوقف ما زاد)!
سين
ـ دايرينكم تعكسوا لينا اسم الممثل دا ، زي ما في (جميل راتب) يكون عندنا (راتب جميل)،
ـ و دا ما بتم إلا تشيلو جبريل، زول (حركتو) بطيئة، و يشيل من المواطن بدل يديهو،
ـ و زول حركتو ذاتها ما دايرو، انا ما عارف متمسكين بيو لي شنو؟
ـ من العدل و المساواة، أدوا فرصة لي زول تاني، لو مصرين!
ـ بعد دا يجي واحد يقول صليت وراو، وشو منور، و وسط الزهور متصور، نحن ما عندنا علاقة بي وشو، نحن دايرنو يقطع وشو، ـ الغريبة بقول لو فشلت بستقيل، يعني الا حبة الطع 100 تبقى بي 1000؟
شين
ـ الربيع قال: الحكومة دايرة تجيب الناس من مصر، شان تجند الشباب!
ـ قول و الله ؟؟
ـ تجند و لا تجنن؟؟
ـ الشباب يا صاحبي بعد زيادة المرتبات للنظاميين، بقوا يتجندوا براهم!
ـ و قال: الخرطوم بعد( الجيميكال) سلاح، ما بتتصلح الا بعد 30 سنة ؟
ـ لا ياخ؟؟
ـ أصلو ما ممكن!
ـ تلتين سنة زي حقت الكي زان؟
ـ و قال الفلول بخططوا !!
ـ أصلو ما ممكن، بخططوا في الولايات و لا شنو؟
ـ الغريبة بعدا دا كلو
ريدك ليو لسه في محلو
ـ المصيبة بعد دا كلو
الربيع يطلع كيكلاوي!
صاد
ـ جاب ليها أشعار نزار قباني (المجموعة الكاملة)،
قالت ليو انت عارف عشان الاقيك بركب مواصلات بي كم؟؟؟؟
ـ يا حليلو قال لسه الحنك بالشعر
ـ يا حليلووو
ـ الكلام بقى بالإشعار ما بالأشعار
و كلو من الأسعار!
ضاد
ـ بتطلعي انتي من (صوت طلقة)
و سط الحفلة مرمية!
طاء
ـ المطرة و السيول ورتكم المعنى الحقيقي للبل!
ظاء
ـ في برنامج قديم، أبدع المعلمون في مقارنة مهنة التعليم بعواسة الكسرة، حاليا التعليم بقى كلو عواسة!
ـ للاعلان عبر مقالات الكاتب ارجو إ رسال رسالة عبر رقم الواتس 0121500148 للوصول لمئات الآلاف من المتابعين!
أسعار تنافسية للمؤسسات التعليمية و الصحية
اللهم صل وسلم وبارك على سيدنا محمد وعلى آله وصحبه بقدر عظمة ذاتك يا أحد!
ودعناكم الله
